جمرات الودیة نسخه متنی

ما دام روحي بالجسَد لا تشعبـيني

تـرى يَسكنـه ابهالبواجي اتهيّجـيـني

ولو طحت من ظهر المهر تالي اندبـيني

و نوحي يبويه وعدّدي بظهر المطـيّه

نوحي يبويـه ولايسمعون العدا النّوح

ترا الشّماته بالضّمير أسطى من الجروح

صاحت يبويـه ويـن تالي بعدك نروح

بتضيع هالعـيله بـوادي الغـاضريّــه

بعدك يَوالينا نصك بوجوهـنـا ويـن

لو هجمت علـينا العـدا وكلنا نسـاوين

يا غيرة الله نضيع ما بـين الملحدين

مجبل علـينـا الليـل يَرْبـاب الحميّـه

حنّ السّبط و تحـنّت ضلوعه عليها

والوت على المظلوم باللهفه إيديهـا

يا هو يلوم الـثّاكل الشـافت وليهـا

يودّع و مـاشي ويـل قلبي للمنيّـه

الحسين يودّع فاطمة الصغرى

وقفت اقبال حسين تنحب طفلة حسين

اتقـلّه العطَش ضرني يبويَ والقصد وين

الله يَبو السـجّـاد مـا تعطـف علـيّــه

فَتّ العطَش قلبي و دَنَت منّي المنيّه

وَصِّـل الشّـاطي وجيب لي قطـرة اميّـه

وعاين يبويه اطفالنا من العطش ميتـين

قلـهـا يَفـاطـم بالبجا نحـّلـتي قــواي

قـعدي يَـبويـه بالخبا و انـا اطلب المـاي

بالله يَزينب سكّتيها مهجة احشاي

قلبي تراهـو من حجيها صـار شطـرين

صاحت يـبويه وين قصدك عنّي اتروح

ياياب قلبي امن العَطش و الحزن مجروح

ويّـاك اخذني للنّهر ما بقت لي روح

العطش فَت اقلوبها كلها النّساوين

قلها يـبنتي للحريـبـه اشلون أودّيك

و بالمعركه يا نور عيني من يباريـك

و تالي للمخيّم يبويـه من يرد بـيك

لو طحت ويّا مَـن للمخيّم تردّيـن

تقلّه يبويه وياك اروحن و ارجع اوياك

للنّهر وصّـــلني يَتَاج الفَخَر بحْمـاك

قلها ينور العين ما أرجع من هناك

أعـتـاق انـا وانتي يشـمّامه تضيعين

اببّاب الخـبا قعـدي يبويـه وارقبـيني

و انجان مـا حال القضا بـينج وبـيـني

المـاي أجيبـه و بالنّحب لا تشـعبيني

قعدت الطّفله وراح عنها المعركه حسين

طالت المـدّه و اليتيمـه ظلّت اتجـود

يَمّ الوديعـه والدّمـع يجري بلخدود

تقلها بعد يَمْتَى يَعمّه والـدي يعود

فَتّ العَطش قلبي وقَلْ شوفي من العين

سـاعـه ولن المهر جـا يسحب شكيمه

والسّرج مايـل حـيف ويصيـح الظليمه

وفرّن من الخيمه الحرم وامّا اليتيمه

عْلَى الوجه خرّت تلطم الهامه باليدين

الحسين و ولده السّجاد

ثار العليل يصيح زينب يـا زجـيّـه

قومي بعجل جيبي العَصى والسّيف ليّه

حسين انفــرد وحده تعالي سنّديني

وجيـبي العصا بْيسراي والسّيف بـيميني

يختي ســكينه بعجل قومي نَهِّضـيني

نخوات ابويـه اتْزلزل السّبع العليّـه

بسيفه طلع والدّمع يجري فوق الخـدود

ينـادي يبويه من اخوتك ظلّيت مفرود

لـبّيك يَـبْن المرتضى يـا سر الوجود

ويـن الانصـار و وين فرسـان الحميّـه

في وين فرسـان الحريـبـه زهـير وهلال

وبريـر وين ومسلم وسردال الرجال

أعني حبيب اللّي لجلنا خاض الاهوال

قلّه بقــوا كلهم على حرّ الوطيّه

ولحّد من انصاري بقى يحمي خيـامي

كلهم تفانوا و الدّهر نكّـس اعلامي

قلّه يبن حيدر أنشدك عن عمـامي

عــبّاس و اخـوانـه ابـدور الهـاشميّـه

فـي وين راعي المرجلـه رب الشّجاعـه

شيخ العشيره التِزْهر الخيمه بشعاعـه

قلّه على شاطي النّهر قطعوا اذراعه

و زينب تنوح عليه نوح الراعبـيّه

قلّه يبويه وين شـبه المصطـفى راح

لـمَّـن سمـع حنّ وصفق راح عـلى راح

قلّه توزّع جسم اخـوك بطعن لرمـاح

و اهناك جسـمه ياضيا عيني رميّـه

قلّه يبويه وين شبل الحسَن جسّـام

قـلّه تخضّب بالدّما و فوق الثّرى نام

و انجان تسأل ما بقى واحد بلخيـام

كلهم تفـانوا و الخيـم ظلّت خليّه

ما ظل غيرك للحرم يحمي حمــاهـا

و ارجـع يـبويـه للنّسا سكّن بجاها

اعوينك الله اعْلَى الرّزايا اللي تراها

بعدي تشوف اهوال ياباقي البقـيّه

بَسْ الله الله ياعلي بعدي بهلَيـتام

حـافظ على النّسوان ساعة حرق لخيام

شبيدي على زينب عقب هالعز تنضـام

ماهي يـبـويه معوّده تركب مطـيّه

أوصيك لو شِفْت العدا يبني لفتكم

دارت علـيكـم بـالمخـيّم فَرْهـدَتْكُـم

إنتَ يبويه و عمّتك باروا حرمكـم

لتْضيع بعــدي هالـبَنات الفـاطميّـه

بس انجـدل من فـوق هالميمون معفـور

شـوف اشْيحل ابهالحراير وسط لخدور

والله هضيمه جان زينب ركبت الكور

عقب المعـزّه يصير اسمـها خارجـيّه

دعوة فضة على القوم

للخيم ردّ حسين يسأل يا نساوين

يـاهي دَعَـت منكم على قـوم الملاعين

زيـنب يحـاجـيـهـا وقـلـبـه بـالـتهـابــه

أرد انشدج يَمخدّرة بـيت النّجـابه

خويه اخبريني امنين هالدّعوه المجابـه

من رخّصج يَعْزيـزة الكرّار تدعـين

قالت له بالشدّات صبري مثل صبرك

ولا لي أمر تدري يخويه غـير أمرك

قلّي ينور العين بالله اشلون بصرك

أنشد عـلي السّجاد وانشد هـالخواتين

طب للخيَم يانور عيني وفـتِّش وشوف

نـازل على العالم ترى زلزال وخسوف

عايَن ولن فضّه تحِن والرّاس مكشـوف

وتقسم على الباري بشرف ست النّساوين

و الكون متغيّر و هي تجري دمعها

تنادي يربّي بجاه من كسروا ضلعها

وحسين رحمه و نقمة الباري دفعها

وقلها يَفضّه عْلَى الغصص لازم تصبرين

مـنّا يفضّه انـتي و محسـوبه علـيـنـا

صبري المصايـبنا وبلانـا اللّي ابتلينـا

شفتي اشسَدا عْلَى امنا وشفتي صبر ابونا

سلمي الأمـر لله يَفضّه لا تجزعـين

انتحبت وقالت سيّدي ماظل لي شعور

من شفت عبدالله الرّضيع بسَهم منحور

خلاّني أدعي على العدا والقلب مسعور

حالك وحـال الطّفل واحوال الخواتين

هيّج عليّ الحزن ذبح الطّفل عطشان

وزيّـد عليّ الفاجعه ضجّـة النّسوان

وانتَ يَبو السّجاد مفرد بين عدوان

خوتك فنَوا واستوحدوك القوم يحسين

خطبة الحسين يوم عاشوراء

توسّط حبيب المصطفى صهـوة نجـيـبه

منبر جـواده والسّبط صاير خطيبه

قلهم أنـاشـدكم و قولوا بالصّراحـه

تدرون انـا جدّي النّبي ربّ الفصاحه

وهذي ثياب المصطفى وعندي سلاحه

وامّي البتوله بضعة الهـادي النّجيـبه

قالـوا نعــم قـلهم اشلون تحاربوني

دمّي تبيحونـه بـيـا سـايـه اخبرونـي

حـتى مـبـاح الـمـاي عنّـه تمـنعوني

هذا رضيعي العَطش فَتْ قلبه لهيبه

مستحل منكم مال لو مطلوب بدْمـوم

لو بدّلت سنّه وشَرِع غيّرت ياقـوم

هالماي مَهْر امّي و انا امْن الماي محروم

ردّ.وا عليّ جواب فعلتكم غـريـبـه

قالوا نريدك تخضع الطاعة ابن زياد

تنزل على حكمه و يفعل كل ما راد

قلهم دعي وهيهات مايحكم بالامجـاد

احـنا الحجج للخالق وجدنا حبيبه

تقطع جفوفي ولا إلى الطّاغي أمـد إيـد

و الفاجر ابن زياد ما طيعه ولا يزيد

شرع الإبا منّي وبالذّل ألوي الجيد

بعـزّ وشرف لازم اتحمل كل مصيبه

جدّي يقول حسين منّي وانا من حسين

لازم اتحمّـل كل مصيبه النُصْرة الدّين

ولو تذبح اطفالي وتسبى هالنّساوين

واقضي بظماي وتنغصب نفسي غصيبه

طغيان ابـن هـنـد الرّجـس لازم أزيـله

ولو يظل جسمي اعلَى الثّرى محّد يشيله

ويوم الحَشِر باصــير للشّيعـه وسيله

وبْكَربلا قبري حصنها التلْتجي بـه

حملة الحسين واصابته

واقف حبيب المصطفى بـين الصّلاتين

يـنظـر خــيامه خالـيه من الهاشميّين

تفرّق الجيش اربع فرق من حوله يدور

و امْن العَطش يابس لسانه و قلبه يفور

رد للعليـل بْخيمتـه بالمرض مغـمور

ودّعـه و سـلّم لـه مواريث النّبيّين

ودّعـه و سـلّم لـه مقاليد الامـامـه

ماشـي يقـلّـه يا عـلي امْعَ السّـلامـه

لاحظ يَبويـه هالأرامـل و الـيـتـامـى

بـاجر تطيب امْن المرض يا قـرّة الـعين

لاحظ العيله لو ركبتوا هزّل النّوق

ولازم يعاندكم الحادي بكـثْرة السّوق

راسي يـبـاريكم على راس الرّمح فوق

ودّعتك الله القوم زحفت للصّواويـن

صوّل على العسكر و مر اعلَى المجاتيل

وعاينها كلهـا موزّعه ذيـج المداليل

والارض غطّاها بجثث و دمومها سيـل

وأشّر بسيفه وحلّق اعلَى الجيش صوبين

لولا القضا يفني العــدا بجرّة البتّـار

لكن عهد ماضي من الواحد القـهّار

بحضرة جميع الانبـيـا بعــالم الانوار

رتـبه شراها بالشّهاده بنصرة الدّين

ألوى العنان وغمد سيفه وظـل يناجي

حـل الوعد مولاي يا ملجا اللاجي

سلّمت نفسي للعـدا تهبّـر اوداجي

ويثبت الدّين وتنجي الشّيعـه المخلصين

سلّمت للَّـه يــا هـنــادي وزّعـيــني

و يالاعوجـيّـه عقب ذبحي رضّضيني

لاخير في الدّنيا عقب خوتي وبنيني

و لن لمـثـلّث شـقّ قلبـه يَلمحـبّـين

مدّ اليمين اعلَى السّهم رايـد يجـرّه

ويسراه مَدْها وانخسف صندوق صدره

واتّجى بقوته وطلّعـه من خلف ظـهره

ياويل قلبي ومَزَع من قلبه الثّلثين

حملات الحسين و مقاتلته

صوّل أبـوسكنه وحيد ورج الاكوان

والخيل واهل الخيل فـرّت من الميدان

يومي لها بـمْهَـنَّدَه و تخـر لصْفـوف

فـوق التّرب وفراشها زانـات وسـيوف

مذروف دمعه اعلَى الخيم والقلب ملهوف

و مفطّـره جبده و ثلثـتيّام عطشـان

مَـدْ عين للعسكر وعين عْلَى الصّواوين

ونظره على الشّاطي ونظره اعْلَى المطاعين

سيفه يكثّرها ويسوّي الواحد اثنين

و الأربعه واحـد يـنظّمها بلسـنان

قحّم وخلاّ الجيش يتّطلب ملاجيـه

والشّمس غابت والعجاج أسدل دياجيه

وعرّج على طور الـمُهر لله يناجيـه

يا رب أنـا للشّـرع والـنّاموس قُربـان

دين العُلى لازم أجاهد في علاجـه

واتّداركه واعدل ابكل صوره اعوجاجه

يا رب انا مالي بعد بالعمر حاجـه

واترك الأمّه جاهليّه و تعبد اوثان

جـاه النّـدا يَحسين انـا ربّك وانـاجيك

عـن هالشّهاده بالحشر ملزوم أجـازيك

يوم القـيامه تلْتِقط هَبْهَبْ أعاديـك

واللي يواليكم يفوز ابحور و جـنان

ألوى العنان وقصد صمصوم الأعـادي

لن الحجر والسّهم وارماح و هنادي

توزّع وخرّ وصاح انا للدّين فادي

اتوسّد الغبرا و المـُهـر يمَّم الصّيوان

{

الناظم

يحسين ما خاب الذي يقصد جنابـك

هيهات مـا ينطرد من يوقف اببّابك

واللي يطب بحماك و يقبّل اعتابـك

يظفر بحاجاته يـبن خــيرة النّسوان

محاورة بين الحسين وزينب وقد سمعت أنّته

سور الحرم يحسين لا تجذب الونّات

بلكت يَـعزْنا امن الحرم تهـدأ الـرّنّات

ودّي أوصّل مصرعك وانجدل ويّـاك

لكن اشبـيدي لازمه اذيالي يتـاماك

لـو يقـدر السجّاد ينهض جان جـيناك

خدّك نوسده وبالدّمع نغْسل الطّبرات

تدري الغُربة اتضعضع اعزوم الرّجاجيل

و آنـا وحيده وعايله ومجبل عَـلَيْ ليل

وخوفي ظعـنّا امن الصّبح من كربلا يشيل

وتضل عاري ابهالفلا واحنا ضعيفات

قلـهـا بـلا تجهـيـز لازم يـتركـونـي

و باجر تمر بـيّه الظّعينه و تنظروني

وانتي وخواتي جان ردتوا توصلوني

مجـبل عليـج الليل جيـبي الفاطميّات

و انجان يـمّي تقدرين تجين لا بـاس

و توصّلـين المشرعــة يَـْم جَسَـد عـبّاس

طلعوا بسواد الليل يستركم عن النّـاس

ولزمي الصّبر يَعزيزة الزّهرا الأمر فات

لكن أخبرج جان جـيتي يا حزيـنـه

اتشـوفين جسمي بالهنـادي موزّعينه

بــس يالوديعه لا تجي يمّي سكينـه

خايف قلبها يذوب من شوف الجراحات

اتعاين اعضاي موزّعه ومفترش رمضـا

و مَقْدر أصدعن شوفها وطرفي أغضّـه

و لو شفت عبرتها تهـل قلبي ايتلظّى

وجْدي عليه يزيد منتجذب الحسرات

الناظم

يحســين ياللي بالمهد ناغـاك جبريل

عبدك تراني ابموزمه وقاصد لك دخيل

قط ما تـخيّب قاصدك يَـبن البهاليل

و اتـنجحه ملزوم و ينال العطـيّات

غشوة الحسين والهجوم على المخيم

اتحيّر العسكر يوم طالت غشوة حسين

شافوه ثلث ساعات مرمي مغمّض العين

ناسٍ تقول حسين بطّل من ونينه

فارقت روحـه وغمّضت للموت عـينه

وآخر يقول حسين كلكم تعرفونه

صاحب حميـّه اعلى بناته و النّساوين